Bi hilabetez hainbat bilera eta lan egin ondoren, ibilbideak sortzeko irizpideak, datak… bat egitea lortu izan dugu: Goierriko Bira martxan jarri da dagoeneko. Ibilbideak eskuratzeko orduan, mugetatik ahalik eta gertuen ibiltzea erabaki dugu, baina bestalde ere garrantzia handia eman diogu zidorretatik eroso ibiltzeari, izan ere, muga beretik ibiltzea beti ez baita posible izan bertan aurkitzen diren sasiak, sakanak... etab. gaindiezinak direlako… handik eginik, gure etapak bukaezinak liratekeelako.

URRETXU-ZUMARRAGA (350 m) – IRIMO (855 m).
Lehendabiziko etapa hau ZUMARRAGAko PARROKIAtik hasiko dugu. AREIZAGA-KALEBARREN (350 m.) enparantzarantz abiatuko gara, eta bertatik BIDEGORRIA hartuz, AZKOITIrako norabidea hartuko dugu; saihesbidearen azpitik igaroko gara, eta ETXEBERRI auzoko aparkalekua albo batera utzi ondoren, UROLA IBAIA zeharkatuko dugu bertan dagoen zubia erabiliz.

Saihesbidera irtengo gara, errepidea zeharkatuko dugu eta beste aldetik, GERRA BASERRIra (350 m) garamatzan pista hartuko dugu. Pinudian kilometro bat edo luze den bihurgunez beteriko errepidetik jarraitu ondoren, BEAIN BASERRIetako (517 m) zelaietara iritsiko gara.

Porlana amaituko da, eta ondoren metro batzuetan zehar, lurrez estalitako pistatik jarraituko dugu. Zerrategi baten antza duen eraikin batera iritsi baino lehen, pista abandonatu eta ezkerrerantz eginez, inguruan bihurgune itxi baten ondoan dagoen beste eraikin bateranzko norabidea hartuko dugu; langa metaliko bat zeharkatuko dugu, eta sigi-saga egingo dugu bertatik ibiliz. Basora itzultzean, TORTOA muinoaren mendebaldetik igotzen den bide maldatsutik jarraituko dugu, NEBERA (611 m.) [1] izeneko lepoaren bila ariko gara-eta. Ezkerreko pista hartuko dugu, txabola baten ondotik igaroz; pixka bat aurrerago, bidegurutze berri batera iritsiko gara, eta bertaraino ekarri gaituen pista utzita (Santa Krutz baserrirantz doa jarraituz gero), bat-batean ...

Gipuzkoako herrialde BANAKETA TRADIZIONALA historikoki 3 sektore desberdinetan definitua izan da: itsasertza, erdialdeko zonaldea eta mendialdea, edota, beste izen batzuk erabiliz KOSTALDEA, BETERRI eta GOIERRI eskualdeak. Iparraldetik hegoaldera eginez gero, Gipuzkoan herriak gero eta garaiera handiagoan kokatuak direla kontuan hartuta, desberdintzerik izan da Beterria (behe + herri) Goierritik (Goi + herri). Kostaldeko sektorea jarraipenik gabeko depresio txikia dugu, erliebeak itsasoraino iristen direlarik. Erdiko sektoreak Deba, Urola eta Oria ibaiek ureztatzen dituzten haranen lurraldearen gehiengoa hartzen du barnean. Sektore garaian azkenik, Arantzazuko Santutegia eta Aralar eta Aizkorriko mendi-multzoak gailentzen dira beste inguru askoren artean.

Tradizionalki erabili izan den antolaketa honetaz gain, Gipuzkoako eskualde-antolaketaren aldetik, herri guztiek parte hartzen duten egungo eskualde banaketa ondorengo hauxe dugu: Bidasoa, Donostialdea, Deba Behea, Deba Garaia, Urola-Kosta, Goierri eta Tolosaldea.